კილიან მბაპე ჩინეთში „შავ სიაში“ მოხვდა: მაო ძედუნზე ხუმრობამ სკანდალი გამოიწვია

მადრიდის „რეალის“ თავდამსხმელი კილიან მბაპე ჩინეთში მასშტაბური ბოიკოტის წინაშე აღმოჩნდა. მიზეზი ფრანგი ფეხბურთელის მიერ ერთ-ერთ ინტერვიუში გაკეთებული კომენტარი გახდა, რომელიც ინტერნეტში გავრცელებულ მემს ეხებოდა. მბაპემ აღიარა, რომ მას და მის მეგობრებს ძალიან აცინებთ სურათი, სადაც მისი სახე „ჩინელი დიქტატორის“ გამოსახულებაზეა გადაკრული.

მიუხედავად იმისა, რომ ფეხბურთელს კონკრეტული სახელი არ უხსენებია, საუბარია მაო ძედუნის პორტრეტზე, რომლის სატირული ფორმით გამოყენება ჩინეთში კანონით იკრძალება. რეაქცია მყისიერი იყო: ჩინეთის სახელმწიფო ტელევიზიამ (CCTV) ესპანეთის ლა ლიგისა და მადრიდის „რეალის“ მატჩების ტრანსლაცია შეაჩერა. მედიის ცნობით, ეთერიდან ასევე გაქრა ყველა სარეკლამო რგოლი, რომელშიც მბაპე მონაწილეობდა.

ბრენდები მბაპესთან კავშირს წყვეტენ

სკანდალს სერიოზული ფინანსური ზიანიც მოჰყვა. ჩინურმა გიგანტებმა, მათ შორის სასმელების მწარმოებელმა Dongpeng-მა და რძის პროდუქტების კომპანიებმა Mengniu-მ და Milkground-მა, მბაპესთან კონტრაქტები გააუქმეს. კომპანიების განცხადებით, ისინი ვერ შეეგუებიან ქმედებებს, რომლებიც ჩინელი ხალხის ეროვნულ გრძნობებს შეურაცხყოფს. სოციალურმა პლატფორმა Xiaohongshu-მაც დაიწყო ფეხბურთელთან დაკავშირებული კონტენტის წაშლა.

„ყველაზე მეტად იმ მემზე მეცინება, სადაც ჩემი სახე ჩინელი დიქტატორის გამოსახულებაზეა გადაკრული.“ — კილიან მბაპე

საკითხს ჩინეთის საგარეო საქმეთა სამინისტროც გამოეხმაურა. უწყების წარმომადგენელმა, ლინ ძიანმა აღნიშნა, რომ ნებისმიერი სიტყვა თუ ქმედება, რომელიც ჩინელი ხალხის გრძნობებს ლახავს, საზოგადოების მხრიდან წინააღმდეგობას წააწყდება. ეს ინციდენტი კიდევ უფრო ძაბავს ურთიერთობას ესპანურ ფეხბურთსა და ჩინეთს შორის, მას შემდეგ რაც წარსულში „რეალსა“ და „ბარსელონას“ პოლიტიკურად მგრძნობიარე თემების გამო ბოდიშის მოხდა არაერთხელ მოუწიათ.

„სიტყვები და საქმეები, რომლებიც ჩინელი ხალხის გრძნობებს შეურაცხყოფს, ბუნებრივია, საზოგადოების ყველა ფენის წინააღმდეგობას გამოიწვევს.“ — ლინ ძიანი

აღსანიშნავია, რომ მბაპეს საფეხბურთო სამყაროში ზედმეტსახელად „დიქტატორსაც“ ეძახიან მისი გავლენების გამო. თავად ფეხბურთელმა სექტემბერში აღნიშნა, რომ ასეთი შედარებები ზოგჯერ პოლიტიკური ცნობიერების ნაკლებობაზე მიუთითებს, თუმცა ბოლო ინტერვიუმ აჩვენა, რომ ის ამ კონკრეტულ ხუმრობას ნაკლებად სერიოზულად უყურებდა.