ხავიერ ტებასი სკანდალშია: ლა ლიგის პრეზიდენტს სასამართლო ელოდება

ესპანეთის სპორტის უმაღლესმა საბჭომ (CSD) ლა ლიგის პრეზიდენტი ხავიერ ტებასი ქვეყნის სპორტულ ადმინისტრაციულ სასამართლოს (TAD) გადასცა. საქმე ეხება 16 ოქტომბერს სოციალურ ქსელში გაკეთებულ განცხადებას, სადაც ტებასმა „რეალ მადრიდის“ საკომუნიკაციო მეთოდები ნაცისტური გერმანიის პროპაგანდის მინისტრის, იოზეფ გებელსის მეთოდებს შეადარა.

სასამართლომ უნდა დაადგინოს, ხომ არ დაარღვია ტებასმა 1990 წლის სპორტის კანონი, რომელიც კრძალავს ისეთ საჯარო ქმედებებს, რომლებიც სპორტის ღირსებას ლახავს. დამნაშავედ ცნობის შემთხვევაში, 64 წლის ფუნქციონერს შესაძლოა დაეკისროს ფულადი ჯარიმა ან აეკრძალოს სპორტულ თანამდებობებზე მუშაობა ერთი ან ორი წლის ვადით.

დაძაბული დაპირისპირება

„ნუთუ ეს არ აზიანებს კლუბებს, მსაჯებს და მილიონობით გულშემატკივარს?“ — ხავიერ ტებასი

ტებასი იცავს თავის პოზიციას და აცხადებს, რომ მან მხოლოდ პროპაგანდისტული ტექნიკები შეადარა და არა იდეოლოგია. მან ასევე გააკრიტიკა CSD იმის გამო, რომ მსგავსი ზომები არ გატარებულა „რეალ მადრიდის“ პრეზიდენტ ფლორენტინო პერესის წინააღმდეგ, რომელიც რეგულარულად აკრიტიკებს ესპანეთის მსაჯთა კორპუსს.

„რეალ მადრიდმა“ ტებასის გადადგომა მოითხოვა. აღსანიშნავია, რომ ეს ლა ლიგის პრეზიდენტის წინააღმდეგ აღძრული უკვე მესამე საქმეა, თუმცა წინა შემთხვევები მისთვის სანქციების გარეშე დასრულდა.