მუსიალა „არსენალთან“ შეხვედრას გამოტოვებს, ნოიერის თამაში კი კითხვის ნიშნის ქვეშაა

მიუნხენის „ბაიერნის“ მზადება ლონდონის „არსენალთან“ გასამართი მნიშვნელოვანი მატჩისთვის გუნდის ლიდერების ტრავმებმა დაჩრდილა. ბუნდესლიგაში „ლაიფციგთან“ მოპოვებული შთამბეჭდავი გამარჯვების (6:1) შემდეგ, კლუბის სპორტულმა დირექტორმა, ებერლმა, ჟურნალისტებთან საუბრისას ჯამალ მუსიალასა და მანუელ ნოიერის ჯანმრთელობის მდგომარეობაზე ისაუბრა.

როგორც გაირკვა, მუსიალა ინგლისურ კლუბთან დაპირისპირებას ნამდვილად გამოტოვებს. ახალგაზრდა შემტევმა ბარძაყის ტრავმა გერმანიის ნაკრებში ყოფნისას, ნიდერლანდებთან მატჩის (1:1) წინ, გახურების დროს მიიღო. მას შემდეგ ის ლაზარეთში იმყოფება. მიუხედავად იმისა, რომ მისი გამოჯანმრთელების პროცესი დადებითად ფასდება, ებერლმა დაადასტურა, რომ ოთხშაბათს მისი მოედანზე გასვლა გამორიცხულია.

„არ მგონია, რომ ის არსენალთან მატჩისთვის გამოჯანმრთელდეს.“

ებერლი

ნოიერის მდგომარეობა და ულრაიხის როლი

რაც შეეხება მანუელ ნოიერს, აქ სიტუაცია შედარებით ბუნდოვანია. გამოცდილ მეკარეს ფეხში სითხე დაუგროვდა, რის გამოც მან „ლაიფციგთან“ შეხვედრა გამოტოვა. ნოიერი ინდივიდუალური პროგრამით ვარჯიშობს მას შემდეგ, რაც გუნდი ნორვეგიიდან დაბრუნდა, სადაც „ვიკინგთან“ გასვლითი მატჩი ფრედ დასრულდა. ბოლო ორ შეხვედრაში „ბაიერნის“ კარს სვენ ულრაიხი იცავდა.

სპორტული დირექტორის თქმით, ნოიერის ტრავმა სერიოზული არ არის, თუმცა მისი თამაში ოთხშაბათს მაინც კითხვის ნიშნის ქვეშ დგას. სამედიცინო შტაბი დააკვირდება, რამდენად სწრაფად გაიწოვება სითხე და შეძლებს თუ არა კაპიტანი სრულფასოვან ვარჯიშს მატჩამდე.

„ის ლაიფციგთან სათამაშოდ ბოლომდე მზად არ იყო, ამიტომ ვნახოთ, შეძლებს თუ არა ოთხშაბათს გამოსვლას.“

ებერლი

მიუხედავად იმისა, რომ მუსიალა უახლოეს მატჩს დააკლდებათ, გულშემატკივრებისთვის სასიხარულოა ის ფაქტი, რომ ფეხბურთელი მალე დაუბრუნდება მწყობრს. ებერლმა აღნიშნა, რომ რეაბილიტაცია ნელი ტემპით, მაგრამ სტაბილურად მიმდინარეობს და ჯამალი ოქტომბრის თვეში აუცილებლად დაუბრუნდება მოედანს.