„მანჩესტერ იუნაიტედის“ ტალანტი ჯეი ჯეი გაბრიელი კლუბის დატოვებას ცდილობს

„მანჩესტერ იუნაიტედის“ აკადემიის ვარსკვლავი ჯეი ჯეი გაბრიელი სატრანსფერო ჭორების ეპიცენტრში მოექცა. 16 წლის ნახევარმცველის წარმომადგენლებმა კლუბს მისი წასვლის მოთხოვნით მიმართეს, რაც გუნდის ხელმძღვანელობამ არ დააკმაყოფილა. მხარეებს შორის კონფლიქტი მას შემდეგ გამწვავდა, რაც ახალგაზრდა მოთამაშის ბანაკმა კლუბს მაღალი ხელფასისა და პირველ გუნდში გარანტირებული სათამაშო დროის პირობები წაუყენა.

„ბაიერნის“ ინტერესი და დაძაბული სიტუაცია

მიუხედავად იმისა, რომ „იუნაიტედი“ ფეხბურთელს კარიერულ განვითარებას ჰპირდებოდა, მოლაპარაკებები ჩაიშალა. კლუბმა უარი განაცხადა კონტრაქტის გაუქმებაზე, რაც იმას ნიშნავს, რომ ინგლისში გაბრიელი ვერსად გადავა. თუმცა, ევროპული პასპორტის ქონის გამო, მას საზღვარგარეთ გადასვლის შანსი აქვს. მედიის ცნობით, მიუნხენის „ბაიერნი“ დაინტერესებულია, თუმცა გერმანული კლუბი ფეხბურთელის ფინანსურ მოთხოვნებს არ ეთანხმება. ასევე საუბარია „რეალსა“ და „ბარსელონაზე“.

„გარედან რომ შევხედოთ, ფიზიკურად ის ჯერ მზად არ არის, რომ ასეთ დონეზე ითამაშოს“, — განაცხადა ფილ ბარდსლიმ.

„მანჩესტერ იუნაიტედის“ ყოფილმა მცველმა ფილ ბარდსლიმ გაბრიელს მოთმინებისკენ მოუწოდა. მისი თქმით, 16 წლის მოთამაშის გარშემო არსებული აჟიოტაჟი უფრო აგენტებისა და მშობლების მიერაა მართული, ვიდრე ფეხბურთელის რეალური მზადყოფნით.