ხაიდუკის ქომაგების ანტისემიტური შეძახილები სკანდალის ეპიცენტრში

ხორვატიის სამართალდამცავმა ორგანოებმა დაიწყეს გამოძიება „ჰაიდუკის“ ქომაგების მიერ კონფერენს ლიგის მატჩის წინ გამართული ანტისემიტური აქციის გამო. ინტერნეტში გავრცელებულ ვიდეომასალაში ჩანს, თუ როგორ სკანდირებენ გულშემატკივრები ნაცისტურ ლოზუნგებს და ახსენებენ ოსვენციმს ამსტერდამის „აიაქსთან“ დაპირისპირებამდე.

ქომაგების მსვლელობა გამოირჩეოდა აგრესიული სიმბოლიკით, მათ შორის იყო კუბო „აიაქსის“ წარწერით. ხორვატიის მთავრობამ მომხდარს „სპორტისა და დემოკრატიული ღირებულებების უარყოფა“ უწოდა.

ოფიციალური პოზიცია და გამოძიება

„ჩვენ მკაცრად ვგმობთ მიუღებელ შეძახილებს, რომლებიც ადიდებს ნაცისტურ რეჟიმს და დაფიქსირდა გულშემატკივართა ნაწილის მიერ სპლიტში გამართულ მატჩამდე.“

ხორვატიის მთავრობა

ადგილობრივი პოლიციის ცნობით, უკვე დაკავებულია რამდენიმე პირი, ხოლო დანარჩენი მონაწილეების იდენტიფიცირება გრძელდება. თავად კლუბმა ბოდიში მოიხადა მომხდარის გამო, თუმცა მათ განცხადებაში კონკრეტულად ანტისემიტური შინაარსი ნახსენები არ ყოფილა.

ხორვატიის ომბუდსმენმა, ტენა სიმონოვიჩ ეინვალტერმა, აღნიშნა, რომ მსგავსი ფენომენები ქვეყანაში სულ უფრო ხშირად ვლინდება, რაც ხშირად პასუხისმგებელი პირების მხრიდან არაადეკვატური რეაგირების შედეგია.