ერლინგ ჰოლანდის მომავალი გაურკვეველია: შესაძლოა თუ არა „ბარსელონაში“ გადასვლა?

ერლინგ ჰოლანდის მომავალი „მანჩესტერ სიტიში“ კითხვის ნიშნის ქვეშ დგება, რადგან კლუბი ფინანსური წესების დარღვევის გამო სერიოზულ სანქციებს ელოდება. იანვარში დაგეგმილმა გადაწყვეტილებამ შესაძლოა „სიტი“ ჩემპიონშიპში დააქვეითოს, რაც, ბუნებრივია, გუნდის ვარსკვლავების მომავალზე დიდ გავლენას მოახდენს.

ესპანური ვარიანტი

მიუხედავად იმისა, რომ ფეხბურთელის გარემოცვა ჯერჯერობით თავს იკავებს სპეკულაციებისგან და აპელაციის პროცესის დასრულებას ელოდება, ინგლისურ მედიაში ხმები მაინც აქტიურად ვრცელდება. პოლ სქოულზმა „The Good, The Bad & The Football“-ის პოდკასტში განაცხადა, რომ ჰოლანდის მომავალს „ბარსელონაში“ ხედავს.

„ბარსელონა. ის „რეალის“ ფეხბურთელს ჰგავს, „რეალის“ მაისურშიც მშვენივრად წარმომიდგენია... მაგრამ ის „ბარსაში“ წავა.“

პოლ სქოულზი

26 წლის ნორვეგიელი თავდამსხმელი, რომელსაც კონტრაქტი 2034 წლამდე აკავშირებს კლუბთან, ევროპული ფეხბურთის ერთ-ერთი მთავარი ფიგურაა. თუ სანქციები კლუბის პრემიერ ლიგიდან გავარდნას ან ევროტურნირებიდან მოკვეთას გამოიწვევს, ნაკლებად სავარაუდოა, რომ ჰოლანდი გუნდში დარჩეს.